ភ្នំពេញ៖ រដ្ឋមន្ត្រីក្រសួងព័ត៌មានសម្រេចលុបអាជ្ញាបណ្ណអនុញ្ញាតផ្សាយព័ត៌មានដល់លោក សាន្ត ប៊ុនធឿន ដោយថាម្ចាស់អាជ្ញាបណ្ណរូបនេះប្រព្រឹត្តិទង្វើអសីលធម៌ ធ្វើឱ្យប៉ះពាល់ដល់សេចក្ដីថ្លៃថ្នូរបស់អ្នកសារព័ត៌មានអាជីព និងបំពានលើកិច្ចសន្យាអាជីវកម្មដែលបានតម្កល់ជាមួយក្រសួង។

ក្នុងប្រកាសចុះថ្ងៃទី២២ ខែសីហា រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានលើកឡើងថាការសម្រេចលុបអាជ្ញាបណ្ណដែលអនុញ្ញាត្តិឱ្យលោក សាន្ត ប៊ុនធឿន ដោយសារម្ចាស់អាជ្ញាបណ្ណរូបនេះបានប្រព្រឹត្តិទង្វើអសីលធម៌ ជេប្រមាថជាសាធារណៈ ធ្វើឱ្យប៉ះពាល់ដល់សីលធម៌សង្គម និងកិត្តិយស សេចក្ដីថ្លៃថ្នូរបស់អ្នកសារព័ត៌មានអាជីព ដែលជាការបំពានយ៉ាងធ្ងន់ធ្ងរលើវិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្រសួងព័ត៌មាន។

ការសម្រេចដកអាជ្ញាបណ្ណផ្សាយព័ត៌មានរបស់លោក សាន្ត ប៊ុនធឿន នេះគឺធ្វើឡើងតែ១ថ្ងៃប៉ុណ្ណោះបន្ទាប់ពីនាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានប្រតិកម្មចំពោះសកម្មភាពរបស់លោក សាន្ត ប៊ុនធឿន ដែលបានផឹកស៊ីបោកចាន ជេរប្រទេចជាសាធារណៈ Live ក្នុងបណ្ដាញសង្គម។ សម្ដេចថា «ចរិតពាលរបស់ សាន្ត ប៊ុនធឿន មិនអាចកែប្រែបានឡើយ» និងបញ្ជាឱ្យបណ្ដេញចេញពីក្របខណ្ឌកងទ័ពផងដែរ៕